Film Leyla adlı bir qıza vurulmuş müxtəlif xarakterli üç dost haqqında danışır. Leyla isə dostların birinə-ipə-sapa yatmayan Kərimə rəğbət bəsləyir. Kərim qızın təsiri altında yaxşılığa doğru dəyişir. Hətta avtomaşın yarışlarının qalibi olur. Filmdə əməyə yüngül münasibət bəsləyən adamlar tənqid edilir.
Bu qrotesk film qəhrəmanlardan biri-Saranın (Gülşad Baxşıyeva) bəxt üzüyünün itməsi əhvalatı üzərində qurulmuşdur. Əslində isə burada söhbət bir nəfərin deyil, bütün xalqın bəxtinin itməsindən gedir. Moşu (Valeh Kərimov) kimilər isə bu itirilmiş bəxti axtarmaqdansa, "xoşbəxtliyə" qafiyə axtarmaqla məşğul olur, öz-özünü və ətrafındakıları aldadırlar. İnsanlar, bir-birinizə laqeyd qalmayın, diqqətli olun. Axı, siz İnsansınız, pul, əşya deyilsiniz, saqqızla aldanmamalısınız. Bu çağırış filmin əsasını təşkil edir. Film bizim bir-birimizə, ətrafdakılarımıza münasibətimiz barədədir.
Pioner təşkilatının 40 illiyi ilə əlaqədar olaraq Bakı pionerləri şənliklərə hazırlaşır. Tədbirə Moskvadan qonaq gələn sehrbaz İo-Kio baba, pionerlərə gözəl bir əyləncə yaşadır. Onun gətirdiyi sehrli xalat insanları keçmişə və gələcəyə apara bilir.
Film iki sevən gəncin məhəbbətindən bəhs edir. Filmdəki hadisələr bizim günlərdə səfalı Abşeron qəsəbələrindən birində, baş qəhrəmanın yuxusu ətrafında cərəyan edir. Əliabbas (İlham Qasımov) sevgilisinə qovuşmaq üçün nə dedi-qodulardan qorxur, nə də hədələrdən. O öz xoşbəxtliyi uğrunda mübarizə aparır... Və istədiyinə nail olur.