Bost urtez aberasteko asmoz munduan zehar ibili ondoren, Westley (Cary Elwes) bere sorterrira itzuliko da, zertarako eta bere andregaiarekin, Buttercup (Robin Wright Penn) ederrarekin ezkontzeko. Neska berreskuratzeko, ordea, Vizzini eta bere menpeko maltzurrei aurre egin beharko die. Proba hura gainditurik, beste oztopo handiago batekin topatuko da aurrez aurre: Humperdinck printzea, zeinek Buttercup gajoarekin ezkontzeko asmoa baitu, nahiz eta hark ez duen maite...
Dorothyk, ostadarraz haraindi joatea amets duen neskak, bere nahia beterik ikusiko du tornado batek bera eta bere zakurtxoa Oz-en lurraldera eramaten dituenean. Mendebaldeko sorgin maltzurra iraintzen duenean, eta iparraldeko sorgin zintzoak hala aholkaturik, Esmeraldako hirira abiatzen da bide horiaren barna. Bertan Oz-eko azti ahalguztiduna bizi da, neskari Kansas-era atzera itzultzen lagun diezaiokeen bakarra. Bidean zehar, txorimaloa, latorrizko gizona eta lehoi koldarra izango ditu lagun. Txorimaloak zerebroa nahi du, latorrizko gizonak bihotza eta lehoiak, aldiz, falta zaion ausardia. Oz-eko aztiak beraiei ere lagunduko dielakoan, Esmeraldarako abenturan neskarekin bat egingo dute.
Lurralde magiko batekin muga egiten duen herrixka ingeles batean, Tristan gaztea zerutik eroritako izar baten bila hasi da, Victoriaren bihotza bereganatzeko. Benetako odisea batek herrialde misteriotsu batera eramango du, eta han aurkituko du izarra. Baina beste batzuk ere izarraren bila dabiltza: erregearen lau semeak eta Lamia, gaztaroa berreskuratu nahi duen sorgin maltzurra.
Alan Parris 25 urtez harrapatuta geratu da Jumanji izeneko mahai-joko magiko eta zahar batean. Azkenean, bi haurrek askatzea lortzen dutenean, animalia exotikoen talde bat ere aske geratu da.
Peter Pan hazi egin da eta orain ospe handiko abokatua dugu. Ez du bere haurtzaroko deus ere gogoratzen, baina Kako kapitainak bere seme-alabak bahitzen dituenean, Inoiz Ezko lurralde liluragarrira itzuli beharko du haien bila. Han, Kanpaitxo maitagarriaren laguntzaz, seme-alabak ezezik behiala izan zen haurra ere berreskuratzeko aukera izango du.
Hemen ditugu berriro ere "Izotz Aroa" eta "Itzoz Aroa 2:Urtze Aldia" filmetako lagunak, historiaurreko abenturarik ikusgarrienean. Oraingo honetan Mannyk eta gainerakoek mundu galdu bat aurkitu dute. Mundu horretan dinosauro bitxi batzuk bizi dira, besteak beste tiranosauro erretxin bat, Sidekin garbitu gabeko kontu bat daukana. Bestetik, Scrat txora-txora eginda dago Scratterekin, baina... zein dira Scratteren benetako asmoak: Scrati bihotza lapurtzea, ala ezkurra lapurtzea?